„Däi Kierper gehéiert dir!“
Ee Saz, deen d’Connie waakreg rëselt. An trotzdeem dauert et nach laang, bis et sech enger Persoun uvertraut an där erzielt, wat et ni engem soe konnt. Endlech huet dem Meedche säin Albdram en Enn an dat, wat scho Joren zréckläit an dem Connie säin Ech mam Ouninumm iwwerdeckt hat, kënnt no an no un d’Liicht. Et gëtt mat Hëllef vun enger Therapeutin Schicht fir Schicht ofgedroen an opgeschafft, bis d ’Connie lues awer sécher nees Iwwerhand iwwer d’Ouninumm kritt.
Bis ewell huet de Jhemp Hoscheit insgesamt 32 Bicher publizéiert, dorënner siwe Romaner an dräizéng Kannerbicher – wéi zum Beispill Monsteren am Gaart (2008), Den Eppes (2013) an De Schmunzel. Eng ko(s)mesch Geschicht (2018). Ouninumm ass seng 15. Publikatioun bei den éditions Guy Binsfeld.
