Lecture / Lesung

Lëtzebuergescht Getierkels, een Duett, oder: Firwat schreift den Eugen Gomringer e Gedicht op d’Fassad vun der Maison Servais?

Liesung mam Guy Rewenig & Samuel Hamen

Cover_Rewenig_Hamen

Dëst Land, dës Gesellschaft op een Nenner, op ee Wuert bréngen – dat probéieren déi zwee Auteure vun dësem Owend jeeweils op hir Manéier:

De Guy Rewenig skizzéiert a sengem Erzielband Do wéinstens däi Sonnebrëll aus, wann s de mam Kapp duerch d’Mauer renns d’Ignoranz, d’Idiotie an d’Ironie, déi an eisem Alldag laueren. An de Samuel Hamen léisst a sengem Debut V wéi vreckt, w wéi Vitess säi Protagonist duerch d’Stad tierkelen an an d’Therapie goen, ouni hien op déi richteg Bunn ze setzen.

Béid Gäscht wäerten aus hiren neie Wierker virliesen, sech géigesäiteg Froe stellen a sech heiansdo (hoffentlech) net eens ginn. A well d’Literatur an d‘Konscht an de leschte Méint ëmmer méi dacks vu Sproochpolizisten a Moralwiechter ënnert d’Guillotine geluecht ginn, diskutéieren de Samuel Hamen an de Guy Rewenig, Member vum PEN Däitschland, iwwert d’Fräiheet vum Kënschtler/Schrëftsteller an doriwwer, datt d’Grenze ronderëm Konschtwierker ëmmer méi enk ginn.

D’Literaturarchiv zu Miersch wäert mat der Erlaabnis vum Eugen Gomringer deen Owend d’Gedicht ciudad (1951/1953), dat op der Fassad vun der Alice-Salomon-Héichschoul zu Berlin deemnächst iwwermoolt gëtt, op d’Fassad vun der Maison Servais projezéieren an den Debat doriwwer lancéieren, wéi déi politesch korrekt Sprooch déi poetesch Sprooch ënner Verdacht stellt.

  • Mis à jour le 27-02-2018